ჩემი მისიაა კომპანიების სწორი მიმართულებით განვითარებაში დავეხმარო.
სპეციალობები:
• ორგანიზაციული განვითარება;
• რეკრუტინგი და ჰედჰანთინგი;
• პიროვნული განვითარება;
• პროექტების მენეჯმენტი;
ისტორია
სკოლა
ჩემი მშობლები საკუთარი შესაძლებლობების მაქსიმუმს აკეთებდნენ იმისთვის, რომ ხარისხიანი სასკოლო განათლება მიმეღო. ზოგადი განათლების დიდი ნაწილი მივიღე კერძო სკოლაში, სადაც სასწავლო პროცესი მოსწავლის ინდივიდუალურ მიდგომას ეფუძნებოდა და უნივერსიტეტისთვის დამახასიათებელი საგამოცდო სისტემაც იყო დანერგილი. საბოლოოდ, მთელი 12 წელი 3 სხვადასხვა სკოლაში დავყავი. აღნიშნულმა ფაქტმა კი საშუალება მომცა შემეძინა ახალ სოციუმში თავის დამკვიდრებისა და ცვლილებებთან ადაპტაციის უნარები. 2009 წელს, როცა სკოლა დავამთავრე, წარჩინებული სწავლის გამო, საქართველოს პრეზიდენტისგან საჩუქრად გადმომეცა ლეპტოპი. ეს უკანასკნელი ნივთი ჩემთვის ოცნებად იყო ქცეული და ამ ფაქტმა ნამდვილად გამაბედნიერა და ჩემი მოტივაციაც სწავლის მიმართ, საგრძნობლად აამაღლა.
უნივერსიტეტი
იმ დროინდელი თაობის უმრავლესობის მსგავსად, მეც არ ვიყავი ჩამოყალიბებული, თუ რა პროფესიის დაუფლება მინდოდა. იმის გამო, რომ სამართლიანობაზე უზომოდ ვიყავი შეყვარებული, გავხდი ბაკალავრიატის სტუდენტი იურიდიულ ფაკულტეტზე. მე-2 კურსის დასასრულს უკვე ვიცოდი, რომ იურისპრუდენცია არ იყო ჩემი საქმე და დავიწყე საკუთარი თავის ძიება: დავდიოდი არაერთ სხვადასხვა სფეროს ტრენინგებზე/სემინარებზე, მონაწილეობას ვიღებდი ინტელექტუალურ პროექტებში, ვეკითხებოდი რჩევებს წარმატებულ ადამიანებს. პირველი აღმოჩენა კი მე-3 კურსის ბოლოს გავაკეთე, როცა ბანაკის ლიდერად დავიწყე მუშაობა. იმ დროს გავაცნობიერე, რომ ადამიანების თვითრეალიზაციაში დახმარება, დიდ სიამოვნებას მანიჭებდა. ბოლო 2 წლის განმავლობაში, ბიბლიოთეკის მენეჯერად მუშაობის პარალელურად, ვიყავი აქტიური ახალგაზრდული ორგანიზაციის ერთ-ერთი დამფუძნებელი და არსებულმა გამოვევებმა უკვე საბოლოოდ შემაყვარა პროფესიონალური მენეჯმენტი. დავიწყე ამ მიმართულებით სამეცნიერო ლიტერატურის კითხვა და მიღებული ცოდნის პრაქტიკაში იმპლემენტირება.
კარიერა და ბიზნესი
უნივერსიტეტის დამთავრების შემდეგ, გადავწყვიტე საკუთარი კარიერა ადამიანური კაპიტალის მართვის მიმართულებით გამეკეთებინა. თუმცა ძალიან რთული აღმოჩნდა: სამართლის დიპლომი ხელს მიშლიდა თუნდაც სტაჟირება დამეწყო. გასაუბრებაზე კი გამოცდილებით ნასწავლის დაჯერება უჭირდათ (მაშინ თვითგანვითარებას ნაკლებად აღიარებდნენ). იყო შემთვევები, ჩემი რეგალიების გამო, მთვლიდნენ ზედმეტად კვალიფიციურ კანდიდატადაც. ბოლოს კი მიზნის მისაღწევად, შევცვალე ამოცანა და დავაფუძნე საკუთარი კომპანია: ,,პროფესიული განვითარების აკადემიას“ 3 წელი ვმართავდი და ჩემი გუნდის წყალობით, დაახლოებით 400 ადამიანის დატრენინგება მოვახერხეთ. როცა მივხვდი, რომ საკუთარი ბიზნესი უკვე ვეღარ მავითარებდა და დიდ ფინანსურ სარგებელსაც აღარ იძლეოდა, საქმიანობა შევწყვიტე. ვიმუშავე ერთ-ერთ წარმატებულ სადაზღვევო კომპანიაში ადამიანური კაპიტალის მიმართულებით, რომლის დროსაც შესაძლებლობა მომეცა, გადამეჭრა მნიშვნელოვანი პრობლემები, მემუშავა საინტერესო პროექტებზე და გამეცნო ასეთივე ადამიანები. საბოლოოდ გადავწყვიტე, რომ კვლავ გამოვსულიყავი კომფორტის ზონიდან და უარი ვთქვი დასაქმებულად მუშაობაზე.
თვითდასაქმება
გავლილმა არასტანდარტულმა ცხოვრებამ და კარიერულმა გზამ, საშუალება მომცა სწრაფად შემეძინა მნიშვნელოვანი უნარები და გამომეტანა სწორი დასკვნები ჩემი სამომავლო ცხოვრების შესახებ. საბოლოოდ ვიპოვე საკუთარი დანიშნულება და ბევრი გარე წინააღმდეგობისა თუ სკეპტიციზმის მიუხედავად, არ შემეშინდა ადგილობრივი ბიზნესისთვის შემეთავაზებინა საკუთარი შესაძლებლობები.
2017 წლიდან დღემდე მაქვს ბედნიერება, მქოდეს საქმიანი ურთიერთობა კომპანიებთან. ქართულ-ავსტრიულ სამაგისტრო პროგრამაზე “ორგანიზაციული განვითარება და კონსულტაცია” მიღებული კომპეტენციები მეხმარება, ჩემი მხრიდან, კიდევ უფრო ეფექტიანად და ეფექტურად მოხდეს ბიზნესის პრობლემების მოგვარება.
ვფიქრობ, რომ დღეს ფრილანსერობა არის ჩემთვის საუკეთესო ამპლუა, ვიყო მაქსიმალურად სასარგებლო სამყაროსთვის.
რატომ ფსევდონიმი Lone Wolf?
იმისთვის, რომ ნებისმიერი სისტემა გადარჩეს, საჭიროა მუდმივად ვითარდებოდეს და შედეგად, ინარჩუნებდეს უნიკალურობას. იმის გამო, რომ ჩემს დამკვეთებს ამ მიმართულებითაც აქტიურად ვეხმარები, აუცილებელი იყო, ჯერ თავად ვყოფილიყავი მაგალითი და არ შემშინებოდა ამის პოზიციონირებისაც. კონკრეტულად ამ ფსევდონიმის აღება კი განაპირობა არა მხოლოდ იმან, რომ მარტო ვმუშაობ და ასეც გაგრძელდება, არამედ იმიტომაც, რომ:
• თუ საქმეს ვიწყებ, მაღალი ხარისხის მისაღებად, საჭირო რესურსების 100%-ს ვდებ მასში;
• მიუხედავად იმისა, რომ მარტო ვარ, არ მეშინია შეცდომების დაშვების;
• ყოველთვის მაქვს ენერგია, დაუღალავად ვიარო დასახული მიზნისკენ;
• არასდროს ვღალატობ საკუთარ მისიას, პრინციპებსა და ფასეულობებს;
• თავისუფლებისა და დისციპლინის სინთეზით, დროულად ვასრულებ საკუთარ დანაპირებს;
• ცვლილებები ჩემთვის გაძლიერების საშუალებაა და არა დანებების წყარო.
ფასეულობები
ადამიანის უნიკალურობა – ნებისმიერი ინდივიდის შესაძლებლობები უსაზღვროა და მას, სწორი მიმართულებით მუშაობის შედეგად, შეუძლია მიაღწიოს წარმატებას.
განვითარება – მუდმივად ვცდილობ შევისწავლო ახალი, თანამედროვე და პრაქტიკული სამუშაო ინსტრუმენტები, რომლებიც ჩემი მიზნების მიღწევაში მეხმარებიან.
მრავალფეროვნება – ყოველთვის მსიამოვნებს ურთიერთობა ადამიანთან, რომელსაც ჩემგან განსხვავებული მსოფლმხედველობა აქვს. ეს მეხმარება, საკითხები შევაფასო ჩემგან განსხვავებული თვალით და ვისწავლო ახალი.
კეთილსინდისიერება – დაუშვებლად მიმაჩნია ვინმესთვის არასწორი მოლოდინების შექმნა. ასევე, საქმეს არ ვიწყებ მაშინ, როცა წინასწარ ვიცი რომ ის არ იქნება შედეგების მომტანი.
პარტნიორობა – დამკვეთებთან მოკლე-გრძელვადიანი თანამშრომლობა ეფუძნება ურთიერთნდობასა და პატივისცემას.