ფასეულობები
უნიკალურობა – ნებისმიერ ადამიანს ან ორგანიზაციას აქვს ინდივიდუალური შესაძლებლობები და მას, სწორი მიმართულებით მუშაობის შედეგად, შეუძლია იყოს გამორჩეული და მიაღწიოს წარმატებას.
განვითარება – მუდმივად ვცდილობ შევისწავლო ახალი, თანამედროვე და პრაქტიკული სამუშაო ინსტრუმენტები, რომლებიც ჩემი მიზნების მიღწევაში მეხმარებიან. ასევე, აქტიურად ვაზიარებ მათ სხვებთან.
მრავალფეროვნება – ყოველთვის მსიამოვნებს ურთიერთობა ადამიანთან, რომელსაც ჩემგან განსხვავებული მსოფლმხედველობა აქვს. ეს მეხმარება, საკითხები შევაფასო ჩემგან განსხვავებული თვალით და ვისწავლო ახალი.
გულწრფელობა – ადამიანებთან ჩემი კომუნიკაცია ქმნის ნდობას და გამჭვირვალობას. შესაბამისად, არასდროს ვქმნი შეუსაბამო მოლოდინებს და სამუშაო მიდგომაც ჯანსაღია.
ისტორია
სკოლა
ჩემი მშობლები საკუთარი შესაძლებლობების მაქსიმუმს აკეთებდნენ იმისთვის, რომ ხარისხიანი სასკოლო განათლება მიმეღო. ზოგადი განათლების დიდი ნაწილი მივიღე კერძო სკოლაში, სადაც სასწავლო პროცესი, მოსწავლის ინდივიდუალურ მიდგომას ეფუძნებოდა და უნივერსიტეტისთვის დამახასიათებელი საგამოცდო სისტემა იყო დანერგილი. საბოლოოდ, მთელი 12 წელი 3 სხვადასხვა სკოლაში დავყავი. ამან კი საშუალება მომცა შემეძინა ახალ სოციუმში თავის დამკვიდრებისა და ცვლილებებთან ადაპტაციის უნარები. 2009 წელს, როცა სკოლა დავამთავრე, წარჩინებული სწავლის გამო, საქართველოს პრეზიდენტისგან საჩუქრად გადმომეცა ლეპტოპი. იქიდან გამომდინარე, რომ ეს უკანასკნელი, ჩემთვის ოცნებად იყო ქცეული, ნამდვილად გამაბედნიერა და ჩემი მოტივაციაც სწავლის მიმართ, საგრძნობლად აამაღლა.
უნივერსიტეტი
იმ დროინდელი თაობის უმრავლესობის მსგავსად, მეც არ ვიყავი ჩამოყალიბებული, თუ რა პროფესიის დაუფლება მინდოდა. იმის გამო, რომ სამართლიანობაზე უზომოდ ვიყავი შეყვარებული, გავხდი ბაკალავრიატის სტუდენტი იურიდიულ ფაკულტეტზე. მე-2 კურსის დასასრულს უკვე ვიცოდი, რომ იურისპრუდენცია არ იყო ჩემი საქმე და დავიწყე საკუთარი თავის ძიება: დავდიოდი არაერთ სხვადასხვა სფეროს ტრენინგზე/სემინარზე, მონაწილეობას ვიღებდი ინტელექტუალურ პროექტებში, ვეკითხებოდი რჩევებს წარმატებულ ადამიანებს. პირველი აღმოჩენა კი მე-3 კურსის ბოლოს გავაკეთე, როცა ბანაკის ლიდერად დავიწყე მუშაობა. იმ დროს გავაცნობიერე, რომ ადამიანების თვითრეალიზაციაში დახმარება, დიდ სიამოვნებას მანიჭებდა. ბოლო 2 წლის განმავლობაში, ბიბლიოთეკის მენეჯერად მუშაობის პარალელურად, ვიყავი აქტიური ახალგაზრდული ორგანიზაციის ერთ-ერთი დამფუძნებელი და არსებულმა გამოვევებმა უკვე საბოლოოდ შემაყვარა პროფესიონალური მენეჯმენტი. დავიწყე ამ მიმართულებით სამეცნიერო ლიტერატურის კითხვა და მიღებული ცოდნის პრაქტიკაში იმპლემენტირება.
კარიერა და მეორე კომპანია
უნივერსიტეტის დამთავრების შემდეგ, გადავწყვიტე საკუთარი კარიერა ადამიანური კაპიტალის მართვის მიმართულებით განმევითარებინა. თუმცა, ძალიან რთული აღმოჩნდა: სამართლის დიპლომი ხელს მიშლიდა თუნდაც სტაჟირება დამეწყო. გასაუბრებაზე კი გამოცდილებით ნასწავლის დაჯერება უჭირდათ (მაშინ თვითგანვითარებას ნაკლებად აღიარებდნენ). იყო შემთვევები, ჩემი რეგალიების გამო, მთვლიდნენ ზედმეტად კვალიფიციურ კანდიდატადაც. ბოლოს კი მიზნის მისაღწევად, შევცვალე ამოცანა და დავაფუძნე საკუთარი კომპანია: ,,პროფესიული განვითარების აკადემიას“ 3 წელი ვმართავდი და ჩემი გუნდის წყალობით, დაახლოებით 400 ადამიანის დატრენინგება მოვახერხეთ. როცა მივხვდი, რომ საკუთარი ბიზნესი უკვე ვეღარ მავითარებდა, საქმიანობა შევწყვიტე. ვიმუშავე ერთ-ერთ წარმატებულ სადაზღვევო კომპანიაში ადამიანური კაპიტალის მიმართულებით, რომლის დროსაც შესაძლებლობა მომეცა, გადამეჭრა მნიშვნელოვანი პრობლემები, მემუშავა საინტერესო პროექტებზე და გამეცნო ასეთივე ადამიანები.
თვითდასაქმება
გავლილმა არასტანდარტულმა ცხოვრებამ და კარიერულმა გზამ, საშუალება მომცა სწრაფად შემეძინა მნიშვნელოვანი უნარები და გამომეტანა სწორი დასკვნები ჩემი სამომავლო ცხოვრების შესახებ. საბოლოოდ ვიპოვე საკუთარი დანიშნულება და ბევრი გარე წინააღმდეგობისა თუ სკეპტიციზმის მიუხედავად, არ შემეშინდა ადგილობრივი ბიზნესისთვის შემეთავაზებინა საკუთარი შესაძლებლობები.
2017 წლიდან დღემდე მაქვს ბედნიერება, მქოდეს საქმიანი ურთიერთობა კომპანიებთან. ქართულ-ავსტრიულ სამაგისტრო პროგრამაზე “ორგანიზაციული განვითარება და კონსულტაცია” მიღებული კომპეტენციები მეხმარება, ჩემი მხრიდან, კიდევ უფრო ეფექტიანად და ეფექტურად მოხდეს ბიზნესის საჭიროებების დანახვა და მათი დაკმაყოფილება.
ჯობ დილი
ტალანტების დაქირავების მიმართულებით ფრილანსერობის შემდეგ, გადავწყვიტე კომპანიის დაფუძნება, რადგან:
• ბაზარზე დავინახე ნიშა, რის გამოც დამკვეთების კმაყოფილება მაღალი იყო და ამის მასშტაბირება გახდა საჭირო;
• კლიენტთა რაოდენობის ზრდის გამო, დამოუკიდებლად ვეღარ ვახერხებდი მათი საჭიროებების დროულად და ხარისხიანად დაკმაყოფილებას;
• მინდა შევქმნა ჩემგან დამოუკიდებელი ბრენდი, რომელიც სამყაროს უწყვეტად მოუტანს სიკეთეს თავისივე არსებობით.
2024 წლიდან, მე და ჩემი გუნდი, აქტიურად ვცდილობთ ბაზარზე ახალი პრაქტიკისა და ჯობ დილერის პროფესიის დამკვიდრებას.
